Ağstafa rayon İcra başçısının müavini haqda ilginc iddialar...

15:51 27-11-2019 145

Prezident növbəti dəfə məmurlara xəbərdarlıq etdi və onlara vətəndaşlarla davranış qaydalarına diqqət etməyi tapşırdı. Prezidentin baş verən qanunsuzluqalara belə reaksiyası müsbət qiymətləndirilməlidir. Belə xəbərdarlıq birinci dəfə deyil, həmişə olub. Prezident məmurların dövlətçiliyə, xalqın problemlərinə həssas yanaşması üçün həmişə xüsusi göstərişlər verib.

Doğrudur, Azərbaycan dövlətçiliyi gəncdir, inkişaf etmiş ölkələrdə olduğu kimi, məmurların formalaşması da o qədər sürətlə gedə bilməz. Amma elə məsələlər var ki, problemlər yaratmağa ehtiyac olmadığı halda, dövlət bu sahəyə xüsusi diqqət yetirdiyi halda, bəzi məmurlar öz işlərinə laqeyd yanaşırlar.

DİA.AZ-a daxil olan məlumatda deyilir ki, Ağstafa rayonu İcra hakimiyyəti başçısının müavini - Sosial-iqtisadi inkişafın təhlili və proqnozlaşdırılması şöbəsinin müdiri Aydın Hacıyevin qardaşı Ağstafada qanunsuz qızıl zinət əşyalarının alqı-satqısıilə məşğuldur. İddialara görə, narkomanların oğurluq yolu ilə əldə etdikləri qızıl zinət əşyalarını Aydın Hacıyevin qardaşına məxsus Ağstafa şəhəri, Heydər Əliyev prospektində yerləşən qızıl mağazasına təhvil verirlər. Bu yaxınlarda bir qadının evindən oğurlanan iki ədəd qulaq sırğası da bu mağaza sahibi tərəfindən alınmışdı və Aydın Hacıyevin qardaşının adı bu cinayət işində hallanmışdı.

Qısa müddət ərzində İcra hakimiyyəti başçısının müavini-Sosial - iqtisadi inkişafın təhlili və proqnozlaşdırılması şöbəsinin müdiri Aydın Hacıyevin qardaşını himayə edə bilmişdi. Sonradan Həmin qadın İcra Hakimiyyətinə şikayətə gəlir. Burada da Aydın Hacıyev qadını şərləyərək onun haqqında Rayon İcra hakimiyyətinin Başçısına düzgün məlumat vermir. Beləliklə qardaşının əyri əməllərini qadının üzərinə ataraq İcra Başçısının fikirlərini yayındırmağı bacarmış özünün və ailəsinin "mələk cildini" qoruyub saxlaya bilmişdir. Özünü bu gün Ağstafa rayon icra hakimiyyətinin başçısı Nizaməddin Quliyevə “məzlum”kimi göstərən Aydın Hacıyev bir neçə qohumunu himayə etməyi bacarır.

Ağstafa rayonu İcra hakimiyyəti başçısının Tatlı kənd İnzibati ərazi dairəsi üzrə nümayəndəsi Hüseynov Qoşqar Hüseyn oğlunu da başçının müavini-Sosial - iqtisadi inkişafın təhlili və proqnozlaşdırılması şöbəsinin müdiri Aydın Hacıyev himayə edir. İddia olunur ki, Qoşqar Hüseynov Aydın Hacıyevin qaynıdır.

İcra başçısının müavini haqda ilginc iddialar...

Daxil olan məlumata görə, Tatlıda kənd təsərrüfatı məhsullarının istehsalçılarına yardımın verilməsi qaydalarına zamanında əməl olunmamışdır. Onu da qeyd edək ki, subsidiyaların verilməsinə bir neçə ildir ki, başlanılıb və bu proses həyata keçirilərkən təkcə Tatlıda deyil, başqa rayonlarında neqativ hal kimi müşahidə olunub. Hətta bu hal rəsmi şəkildə də etiraf olunub. Belə ki, son illər Maliyyə Nazirliyinin apardığı yoxlamalar zamanı bir sıra rayonlarda əkin sahələrinin həcminin qanunsuz olaraq şişirdildiyinə dair məlumatlar ortaya çıxmışdır. Başqa sözlə, əkin sahələrinin həcmi artıq göstərilməklə subsidiya üçün ayrılan vəsaitin bir hissəsi mənimsənilmişdir.Belə nöqsanlar isə şübhəsiz ki, subsidiyaların əhəmiyyətini heçə endirməklə yanaşı,onların aqrar sahəyə müsbət təsirini də azaltmışdır. Digər maraqlı cəhət isə ondan ibarətdir ki, subsidiyaların mənimsənilməsi və ört-basdır edilməsi bütün respublika üzrə eyni ssenari üzrə həyata keçirilmişdir.

Məmur balalarının qudurğanlığı bütün əndazələri aşmaqdadır. Azərbaycan prezidentinin müşavirələrin birində sərt çıxışı da, deyəsən, ibrət dərsi olmayıb. Vəzifəli şəxslərin övladları hələ də bu əməllərini davam etdirməkdədir. Əslində onlar qorxunc bir statistikaya nəzər yetirəndə nəticə çıxarmalı idi. Çünki onlarla ailənin faciəsinə səbəb olublar. Amma belə görünür ki, məmur balalarının özbaşına hərəkətləri davamlıdır. Aydın Hacıyevin xaricdə yaşayan oğlu sosial şəbəkələrdə gündəmi zəbt etməkdə davam edir.

Məmur və ya sıravi vətəndaş olmasından asılı olmayaraq hər bir ata, nəsil ağsaqqalının tərbiyəsində, davranışlarında problem varsa, mütləq həmin ailədə böyüyən uşaqlar da həmin xarakterə sahib olacaq. Tərbiyə insana Allah vergisi deyil ki?! Hər kəs tərbiyəni görüb- götürür. Təbii ki, bunu bütün məmur övladlarına aid etmək olmaz. Övladları, qohumları savadlı, intellektli, ailəsi hər kəs üçün örnək ola biləcək, dövlətə vətənə sadiq kifayət qədər məmurlarımız, generallarımız var. Amma nə yazıq ki, qoçu yetişdirməkdə az qala bir- biri ilə yarışa girən vəzifəli şəxslərimiz də az deyil. Onlar sanki öz övladlarına ailə tərbiyə əvəzinə cəmiyyətə qənim kəsilməyin yollarını aşılayırlar. Nə dövlətə, nə də vətəndaşlara hörmət edirlər. Adi insan anlayışı bunlar üçün özündə heç nəyi ehtiva etmir. Məmur övladlarının, general qohumlarının vaxtaşırı olaraq qanunsuzluqlarının şahidi oluruq. Kriminal insanlar qalıb bir kənarda məmur övladları camaat, dövlət üçün ciddi baş ağrısına çevrilib. Onların atdığı hər addım dövlətçilik sistemində bir zərbədir. Onların harınlığı üzündən vətəndaşlarda dövlətə qarşı bir narazılıq yaradır. Cəmiyyətdə belə bir düşüncə formalaşıb ki, bütün bunların artmasına dövlət şərait yaradır, göz yumur.

Özbaşınalığı ilə ad çıxaran məmur övladlarının vaxtında islah olunması az da olsa digərlərinin qanunsuzluqlarının qarşısı alar:

“Bu addımı Aydın Hacıyevdən gözləməyə dəyməz. Onun tərbiyə vermək bacarığı olsa idi, bunu elə ən başda edərdi. Tərbiyə edib, cəmiyyətə ötürdüyü uşaq sonradan cəmiyyət üçün baş bəlasına çevrilməzdi. Deməli, onda övladına verəcək tərbiyə yoxdur. Əslində buna təəccüblənməməliyik. Məhz bu cür gənclərin valideynləridir ki, onların yol verdikləri qanunsuzluqlar ucbatından ölkəmiz ikiqat böhrana məruz qalıb. Qlobal dünya böhranından əlavə məmurlarımız da ölkəmiz üçün bir problemə çevrilib. Ölkəmizin bugünkü vəziyyətində hansısa məmur övladlarının qanunsuzluğu cəmiyyətdəki etirazları daha da alovlandıra bilər. Hüquq mühafizə orqanları, ictimai təhlükəsizlik idarəsinin əməkdaşları bu məsələdə prinsipal olmalıdırlar. Onların ən kiçik xətalarına belə güzəştə getmək olmaz. Hətta onlar asayişi pozduğu halda kasıb uşaqlarından daha sərt cəzalandırılmalıdırlar. Əks halda onları yoluna düzmək bizim üçün çətin olacaq."

Qeyd edək ki, son zamanlar Ağstafa rayonu İcra hakimiyyəti başçısının müavini-Sosial - iqtisadi inkişafın təhlili və proqnozlaşdırılması şöbəsinin müdiri Aydın Hacıyevin oğlunun sosial mediada dəbdəbəli həyatını əks etdirən görüntülər yayılıb və əlbəttə, bu fotofaktlar ictimaiyyətədə siravi vətəndaşların ciddi etirazına səbəb olub.

İddia olunanlarla bağlı bütün tərəfləri dinləməyə hazırıq.

Mənbə DİA.az